Қарақиялық кәсіпкер ақаша жинақтайтын мүсіндер жасауды қолға алды

Қарақиялық кәсіпкер гипстен құйылған мүсіндер жасаумен айналысады. Ол бұл ерекше кәсіп түрін Ресейде оқып жүрген кезінде үйренген екен, деп хабарлайды InAktau.kz.

Қарақиялық жас кәсіпкер Данияр Мурзабеков гипстен ақша жинақтайтын мүсіндер құйып шығарады. Ол кәсіпті Ресейдің Волгоград қаласында ЖОО-нын оқып жүрген кезінде үйреніпті. Сабақтан бос уақытын пайдалы іспен айналысуды жөн көрген студент мүсін жасайтын цехқа жұмысқа тұрып, сол жерде осы істің қыр-сырын меңгеріп алады.

"Ресейден келгеннен кейін неге Қазақстаннан да мүсін шығаратын цех ашпасқа деп ойладым. Себебі, цехтан шығарылған өнімнің 80%-ын Қазақстанға сатуға жіберетін еді", -дейді ол.

Кәсіпкер "Атамекен" микроқаржы ұйымынан 2,5 млн. теңге несие алып, Құрық ауылынан шағын цех ашты. Қазір 2 адамды тұрақты жұмыспен қамтып отыр. Ол бұйымдарды көтерме бағамен Ақтаудағы сауда нүктелеріне өткізеді. Бағасы 1700 теңгеден басталады. Осы жылы бизнесін кеңейту үшін «Ерсай» компаниясынан 3 млн. теңгенің грантын жеңіп алды.

Бизнесін өткен жылдың қараша айында бастаған кәсіпкер бүгінгі күнге дейін 600 дана ақша жинақтайтын мүсін жасаған. Болашақта мүсіндерді ұлттық нақышта жасап шығаруды жоспарлап отыр.